ក្នុងរយៈពេលកន្លងមកនេះ ឃើញថា បងប្អូនអាជីវករកាប់សាច់ជ្រូករស់និងលក់សាច់ជ្រូក បានបង្ហាញក្តីកង្វល់របស់ខ្លួនតាមបណ្តាញសង្គមហ្វេសប៊ុក បញ្ហាជ្រូកចេះតែឡើងថ្លៃពីមួយថ្ងៃទៅមួយថ្ងៃ ខណៈក្រុមអាជីវករក៏បានសំណូមពរដល់មន្ត្រីជំនាញពាក់ព័ន្ធ ជាពិសេសរដ្ឋមន្ត្រីក្រសួងកសិកម្ម សូមមេត្តាមានកិច្ចអន្តរាគមន៍ទប់ស្កាត់ការដំឡើងថ្លៃសាច់ជ្រូកនេះផង ។
យោងតាមគណនីហ្វេសប៊ុកមួយឈ្មោះថា «Bunthorn Ky» បានសរសេរខ្លឹមសារ ថា ៖
នាងខ្ញុំ ចែចិនលក់សាច់ជ្រូកបោះដុំ សូមសំណូមពរដល់សមាគមផ្គត់ផ្គង់ជ្រូក អ្នកម្ចាស់សត្តឃាត អ្នកកាប់ជ្រូករស់ អ្នកយកជ្រូកប៉ាយ អ្នកយកសាច់ពន្លះ ចូលរួមតវ៉ា រឿងជ្រូករស់ឡើងថ្លៃខុសប្រក្រតី ឡើងឥតល្ហែ សូមចូលរួមទាំងអស់គ្នាដើម្បីប្រយោជន៍រួម អ្នកចិញ្ចឹមមួយចំនួនតូចគេអាចសហការគ្នាឡើងថ្លៃបានតាមចិត្ត ហេតុអ្វីអ្នកទិញជ្រូករស់និងអ្នកកាប់ជ្រូករស់ មិនព្រមសហការគ្នារកដំណោះស្រាយដើម្បីបានតម្លៃថេរ សម្រាប់ជាប្រយោជន៍ទូទាំងប្រទេស ។
ហ្វេសប៊ុកដដែល បានបន្តទៀតថា ជ្រូករស់តម្លៃដើមត្រឹម៨០០០រៀល អាចចំណេញហើយ តែពេលនេះឡើងជិតដល់១២០០០រៀល ហើយគិតឡើងដល់ណាទៀត ចូលរួមទាំងអស់គ្នាដើម្បីប្រយោជន៍រួម អរគុណ ។
ដោយឡែក គណនីហ្វេសប៊ុកមួយទៀតឈ្មោះ «SokEng Heng» បានសរសេរផងដែរ ថា ៖
ជ្រូកសាច់ កំពុងឡើងថ្លៃហើយ កសិករយើងអើយលក់បានប៉ុន្មានហើយ ?
ហ្វេសប៊ុកមួយទៀតឈ្មោះ «Ah Vy» ក៏បានសរសេរដែរថា ៖
សាច់ជ្រូករាល់ដង១គីឡូ១៥០០០រៀល លក់នៅមិនចង់ចំណេញ ចុះទម្រាំឥឡូវឡើងដល់១៨០០០រៀល ដឹងលក់មិចទេ បើយើងដាក់តិចជាងមុនឬឡើងថ្លៃ ខ្លាចម៉ូយថាថ្លៃឬតិចម៉េស ។
អង្គភាពសារព័ត៌មានគេហទំព័រ កម្ពុជាឈ្នះ ដកស្រង់ក្តីកង្វល់របស់បងប្អូនប្រជាពលរដ្ឋតាមបណ្តាញសង្គមហ្វេសប៊ុក យកមកចុះផ្សាយពេលនេះ នៅមិនទាន់គ្រប់នោះទេ ពោលគឺ នៅមានបងប្អូនជាច្រើននាក់ទៀត ក៏បានបង្ហាញក្តីកង្វល់ប្រហាក់ប្រហែលគ្នាផងដែរ ជុំវិញបញ្ហាជ្រូករស់ឡើងថ្លៃ និង ចេះតែបន្តឡើងថ្លៃពីមួយថ្ងៃទៅមួយថ្ងៃនេះ ។
បងប្អូនទាំងអស់គ្នាដែលមានបញ្ហាជ្រូករស់ឡើងថ្លៃ អាចផ្តល់ព័ត៌មានបន្ថែមមកកាន់ អង្គភាពសារព័ត៌មានគេហទំព័រ កម្ពុជាឈ្នះ បាន តាមរយៈលេខទូរសព្ទ 097 54 59 059 (Telegram) ក្រុមការងាររបស់យើង នឹងទៅសម្ភាស៍បងប្អូនផ្ទាល់តែម្តង ។ សូមអរគុណ ៕
