តាកែវ៖សមត្ថកិច្ច បានឃាត់ខ្លួនជនបង្កដែលបើកឡានដឹកខ្សាច់បុកអ្នកជិះកង់ នៅស្រុកព្រៃកប្បាស ខេត្តតាកែវ បានហើយ កាលពីថ្ងៃទី១២ ខែមីនា ។
ករណីគ្រោះថ្នាក់ចរាចរណ៍ នេះ បានកើតឡើងនៅចំណុចភូមិស្នោ ឃុំស្នោ ស្រុកព្រៃកប្បាស ខេត្តតាកែវ កាលពីថ្ងៃទី១៥ ខែកុម្ភៈ ឆ្នាំ២០២៥ ។
សមត្ថកិច្ច បានឱ្យដឹងថា ការចាប់ខ្លួនជនបង្ក នេះ គឺ អនុវត្តតាមដីកាបញ្ជាឱ្យចូលខ្លួនរបស់លោក ទៀវ ពណ្ណរាយ ព្រះរាជអាជ្ញារង នៃអយ្យការអមសាលាដំបូងខេត្តតាកែវ ។ ជនជនបង្កមានឈ្មោះ ណាំ ឈាវ ហៅអាងោល អាយុ២៨ឆ្នាំ រស់នៅភូមិអណ្ដូង ឃុំក្រាំងយ៉ូវ ស្រុកស្អាង ខេត្តកណ្ដាល។
សូមរំលឹកថា រថយន្ដប្រភេទបែនដឹកខ្សាច់ (កង់៦) បានបុកអ្នកជិះកង់បណ្ដាលឲ្យស្លាប់ភ្លាមៗនៅកន្លែងកើតហេតុ នាវេលាម៉ោង៥៖១០នាទីព្រឹក ថ្ងៃទី១៥ ខែកុម្ភៈ ឆ្នាំ២០២៥ ចំណុចភូមិស្នោ ឃុំស្នោ ស្រុកព្រៃកប្បាស ខេត្តតាកែវ។
បើតាមក្រុមគ្រួសារសាច់ញាតិ បានឱ្យដឹងថា មុនពេលកើតហេតុជនរងគ្រោះឈ្មោះ ម៉ម ឈីម ភេទប្រុស អាយុ៦៦ឆ្នាំ បានជិះកង់ហាត់ប្រាណនៅតំបន់ខាងលើ ហើយក៏ជួបគ្រោះថ្នាក់ចរាចរណ៍ដោយសាររថយន្ដបង្កបុក បណ្ដាលឲ្យរងរបួសធ្ងន់ និងស្លាប់ពេលបញ្ជូនតាមផ្លូវទៅមន្ទីរពេទ្យ ៕
